Stord-handballen på lag med MOT
Rådmann og lokal MOT-leiar Magnus Mjør signerte fredag 20. november ein samarbeidsavtale med styreleiar i Stord Handball, Aksel Sæther og styreleiar i Stord HK Elite, Øyvind Nyhammer. Avtalen gjer at klubbane inngår i «lokalsamfunnet med MOT».
Rådmann Magnus Mjør med styreleiarane Øyvind Nyhammer og Aksel Sæther
Føremålet med avtalane er at partane gjennom felles innsats ønskjer å bidra til eit varmare og tryggare oppvekstmiljø, som er MOT sin visjon. Klubbane har forplikta seg i å prioritere arbeidet med barn og ungdom høgt, og vert omtala som «aktive medspelarar» i det lokale MOT-arbeidet. Dei skal vere med å styrkje ungdommane til å ta eigne val og vise mot til å leve, mot til å bry seg og mot til å sei nei.
Fritidsarenaen er ein viktig arena der ungdommane får setja MOT-verktøya ut i livet. Klubbane skal leggje til rette for at dei vaksne i klubbane er gode rollemodellar for barna og ungdommane, og gjennom god kommunikasjon og kulturbygging bidra til å tydeleggjere normer og haldningar i laga og i klubben. Allereie har 32 lagleiarar gjennomført ei fire timars samling med fokus på kor viktig deira rolle er for barna og ungdommane.
Stord Handball er glade for å ha fått med seg ein så solid og kjend aktør som MOT med på laget for å kunne gje klubben sine barn og unge eit enda betre og tryggare tilbod både på og utanfor handballbanen.
