Heider og ære på årsmøtet

Tradisjonen tru vart det på årsmøtet i Stord IL delt ut heidersmerke til ei rekke eldsjelar. 

I tillegg til mange flotte representantar frå dei andre gruppene, vart åtte representantar frå handballen satt pris på i form av utmerkingar. 

GULLMERKET
Øyvind Epland har vore "handballfar" i nærare 30 år og har vore særs engasjert i heile denne perioden. Han har sete i styret i klubben og vore med på å utforma særs gode arrangement rundt elitekampane. Han har hatt ansvar for det tekniske under Handballfestivalen i mange år og har løyst alle oppgåver på ein særs god måte. Øyvind veit alltid kven han må be om hjelp for å få ting gjort på enklaste måte - til beste for alle!

SØLVMERKET
Anne Marie Nyhammer har vore aktiv handballspelar for Stord, og har dei siste ti åra organisert fritidsaktivitetane under Handballfestivalen. Ho syner ei svært positiv haldning, og klarer på ein god måte å få med seg dei ressursane ho treng for å få arbeidet gjort – både fameliemedlemmar og andre. Ho er nytenkande, samtidig som ho tek vare på dei tinga som har fungert bra tidlegare.

BRONSEMERKET

Eva Litlabø har vore med og organisert sekretariatet under Handballfestivalen i mange år. Ho er særs positiv og flink til å få folk til å jobbe saman i rett retning.

Richard Juvik har vore med i teknisk gruppe i nesten ti år saman med Øyvind Epland. Desse to har hatt eit godt samarbeid og har vist at dei har full kontroll på alle oppgåvene dei har stått ovanfor. Rigging av banar, oppstilling til defilering, tette toalett, mobile vaskar, fulle boskorger og manglande straum – dette er ting Richard har ordna for oss i snart ti år!

Dag Vidar Nordhus har sete i styret til Stord Elite og lagt ned mange timar som oppmann på aldersbestemte lag i ein lang periode. Han har jobba med tryggleiken under Handballfestivalen i mange år, og har her heva kvaliteten på tryggleiksarbeidet til eit unikt nivå – noko som er særs viktig for at festivalen har blitt det den er i dag med over 350 deltakande lag!

Rune Loftheim har vore i Stordhandballen i mange år. Han har vore trenar og oppmann for fleire spelargrupper dei siste åra, og har i tillegg vore oppmann for Elitelaget. Han er alltid positiv til dugnadar og andre oppgåvar i klubben – og er flink til å overføre denne haldninga til spelarane sine.

Sigbjørn Almås (var ikkje til stade) har lang fartstid i klubben som spelar, og etter kvart som trenar og oppmann. Han har ei sterk ansvarskjensle for at ting skal fungera godt i klubben, og tek initiativ til endringar for å oppnå dette. Han tek tak der han ser det trengs, anten på daglege arrangement i hallen eller under Handballfestivalen og er eit godt førebilete for gutane han har trena og vore oppmann for.

I tillegg fekk Arve Havnerås sølvmerket frå fotballgruppa (men han vart og innstilt frå handballgruppa) og Aksel Sæther fekk bronsemerket. 

Stord Handball gratulerar alle eldsjelane - og vil retta ei stor takk til alle som legg ned ufattelege timar for å legge til rette for aktivitet for barn og unge på Stord!