MiniHAFO 2019
Dagens miniHAFO er vel overstått, og om lag 200 born frå 1. - 3. klasse har vore i aksjon. Totalt 24 lag frå Leirvik, Hystad, Rommetveit og Langeland har deltatt på den årlege cupen, der ein spelar ein omgong fotball, og ein omgong handball.
Smil, latter, engasjement, innsats, vilje og samarbeid er stikkord for årets cup. Kristine Vad, lagleiar for gutane i 3. klasse på Rommetveit skule meiner HAFOcup er med på å bidra til eit betre klassemiljø, samstundes som ho håpar at fleire får lyst til å byrja med fotball, handball eller begge deler.
HAFOcup er ein mangeårig tradisjon i Stord Handball, og sportsleg leiar Bjarte Epland tykkjer det var kjekt å sjå så mange glade born og vaksne i hallen denne laurdagen. "Dette er eit flott arrangement med fysisk aktivitet for både dei som spelar handball og/eller fotball, samstundes som det gir dei som ikkje er ein del av eit lag moglegheiten til å oppleve dette. HAFOcup har i lang tid, og er framleis, eit flott tiltak for å styrke samhaldet i klassen." Epland var trenar for Hystad 2 B, eit lag beståande av ni gutar.
Me takkar laga og trenarane for innsatsen, og ynskjer alle velkomen tilbake til HAFOcup neste år!
