Haugesund Sparebank har tildelt Stord Handball 100.000 kroner til prosjektet «Vikahaugane – sosial møteplass». Saman med tidlegare tildelte prosjektmidlar betyr dette at arbeidet med prosjektet kan starte.
Andreas Bakke i Stord Handball tok imot gåvesjekken på 100.000 kroner frå Haugesund Sparebank. Støtta gjer det mogleg å realisere prosjektet «Vikahaugane – sosial møteplass», som skal skape ein trygg og inkluderande møteplass for born, ungdom og familiar på Vikahaugane.
– Me er utruleg takksame for støtta frå Haugesund Sparebank. Dette er eit prosjekt me har stor tru på, og som vil kome langt fleire enn våre eigne medlemmar til gode. Med denne tildelinga kan me endeleg setje planane ut i livet, seier marknadsansvarleg Andreas Bakke.
Ein møteplass for heile lokalsamfunnet
Vikahaugane er kvar veke ein naturleg møteplass for fleire hundre born og unge gjennom skule, treningar, kampar og annan aktivitet. Samstundes har Stord Handball lenge sett eit behov for å utvikle området til å bli meir enn berre ein arena for organisert idrett.
Prosjektet «Vikahaugane – sosial møteplass» skal bidra til å skape ein trygg, inkluderande og attraktiv møteplass for born, ungdom og familiar – open for alle, uavhengig av om ein er medlem i Stord Handball eller ikkje.
Tre viktige tiltak
Prosjektet består av tre hovudtiltak:
🛋️ Ny sosial lounge
Konferanseområdet skal forvandlast til ein moderne og innbydande lounge med nye møblar, sitjegrupper og eit triveleg miljø. Her kan ungdom møtast før og etter trening, ete eller berre vere saman i trygge omgjevnader.
🥗 Eit sunt og tilgjengeleg mattilbod
I samarbeid med den lokale aktøren Urt og Ugras skal det vidareutviklast eit sjølvbetent mattilbod med sunne og rimelege måltid. Målet er å gjere det enklare for ungdom å få eit godt måltid mellom skule, trening og andre aktivitetar, samstundes som løysinga bidreg til minimalt matsvinn.
🎨 Leggje til rette aktivitet og leik
Som ein del av prosjektet ønskjer klubben å leggje til rette for at familiar kan kome til hallen for leik og aktivitetar. Det skal investerast i leiker og aktivitetsutstyr for dei yngste, slik at også born i alderen 2–8 år får eit spanande og inkluderande tilbod.
Meir enn handball
For Stord Handball handlar prosjektet om langt meir enn idrett. Klubben ønskjer å skape ein møteplass som fremjar aktivitet, fellesskap og tilhøyrsle – ein stad der born og unge kan vere saman i trygge omgjevnader også utanom trening og kamp. Ved å senke terskelen for deltaking håpar klubben å bidra til auka inkludering, førebyggje utanforskap og skape fleire gode opplevingar i nærmiljøet.
Ein stor takk
Me ønskjer å rette ei stor takk til Haugesund Sparebank for tilliten og støtta til prosjektet. Samfunnsbidrag som dette gjer det mogleg å realisere tiltak som kjem heile lokalsamfunnet til gode.
No ser me fram til å kome i gang med arbeidet, og me gler oss til å ønskje born, ungdom og familiar velkomne til ein endå meir levande og inkluderande møteplass på Vikahaugane.