Når over 800 barn og ungdommar samlast på Vikahaugane til årets HAFO 30. og 31. oktober, blir det med ei viktig nyheit: I år blir det heilt gratis å delta!
Det blir mogleg fordi Proled og Engelsen Entreprenør går inn som hovudsponsorar for arrangementet og dekkjer kostnadane som tidlegare har vore finansierte gjennom deltakaravgifta.
Dermed forsvinn avgifta på 50 kroner per deltakar, og alle kan vera med – heilt gratis.
– Dette treff veldig godt med det me ønskjer at HAFO skal vera. Her skal terskelen for å delta vera låg, og det viktigaste er å vera saman, vera i aktivitet og ha det kjekt. Når Proled og Engelsen Entreprenør gjer det mogleg for oss å fjerna deltakaravgifta heilt, er me utruleg glade for det, seier Bjarte Epland i Stord Handball.
To idrettar – og plass til alle
HAFO står for HAndball og FOtball, og har gjennom mange år vore ein populær tradisjon på Vikahaugane.
Fredag 30. oktober inviterer me ungdom på 8.–10. trinn, før barneskuleelevane frå 1.–7. trinn tek over hallane laurdag 31. oktober. Totalt ventar me over 800 barn og ungdommar gjennom dei to dagane.
Men HAFO handlar om langt meir enn å vinna kampar. Her blandar me handball og fotball, og like viktig som resultata er samhald, Fair Play, kreativitet og det å gjera noko kjekt saman med klassen eller venegjengen.
Det er nettopp denne tankegangen som gjorde arrangementet til ein svært god match for Proled og Engelsen Entreprenør.
Vil slå eit slag for allsidigheita
Dei to lokale verksemdene deler eit sterkt engasjement for barne- og ungdomsidretten – og eit ønske om at flest mogleg skal få vera med, lengst mogleg.
For dei handlar god barneidrett om meir enn å bli best i éin idrett så tidleg som mogleg. Barn bør få prøva ulike aktivitetar, utvikla seg i sitt eige tempo og først og fremst oppleva idrettsglede, meistring og fellesskap.
– Me er veldig glade for å få vera med på HAFO. For oss er det viktig at økonomi i minst mogleg grad skal vera eit hinder for at barn og unge kan delta i idretten. Samtidig har me stor tru på allsidig aktivitet og at barn skal få prøva forskjellige idrettar utan at ein treng å spesialisera seg for tidleg. HAFO representerer mykje av det me meiner barne- og ungdomsidrett skal handla om – aktivitet, fellesskap og idrettsglede, seier Amund Engelsen Landro i Proled.
Dagleg leiar i Engelsen Entreprenør, Andre Engelsen Milje, deler engasjementet.
– HAFO er eit arrangement me veldig gjerne vil stilla oss bak. Her møtest barn og ungdom på tvers av idrettar, og fokuset ligg like mykje på samhald og det sosiale som på resultat. At me saman med Proled samtidig kan bidra til å gjera arrangementet gratis for alle, gjer det ekstra meiningsfullt for oss, seier Andre Engelsen Milje.
Verdiar som varer
For menneska bak både Proled og Engelsen Entreprenør er engasjementet også tufta på eigne erfaringar frå idretten.
Å vera ein del av eit lag handlar om meir enn det som skjer på banen. Ein lærer å jobba saman mot eit mål, stilla opp for andre, handtera både siger og tap og kjenna på meistring og fellesskap.
– Ikkje alle skal bli toppidrettsutøvarar, og det er heller ikkje poenget. Gjennom idretten lærer ein mykje om samhald, samarbeid og det å stilla opp for kvarandre. Det er erfaringar og verdiar ein kan ta med seg vidare, også lenge etter at ein har slutta å spela, seier Engelsen Milje.
Både Proled og Engelsen Entreprenør har over tid vist eit sterkt lokalt engasjement. Med HAFO blir resultatet av bidraget svært konkret:
Over 800 barn og ungdommar får to dagar med aktivitet, idrettsglede og fellesskap – utan at det kostar dei ei krone å delta!
Me gler oss til HAFO-helga!
Fredag 30. oktober fyller ungdomsskuleelevane hallane på Vikahaugane, før dei yngste tek over laurdag. Handball. Fotball. Fair Play. Utkledning. Heiagjengar. Konkurranse. Og aller mest – masse aktivitet og moro saman med andre.
I 2026 er alle inviterte – og deltakinga er gratis!
Ein stor takk til Proled og Engelsen Entreprenør som gjer det mogleg. 🤍🖤
VILJE – SAMHALD – RESPEKT
